تاند:( سې شنبه، د قوس دوه ويشتمه) د افغانستان لپاره د ملګرو ملتونو د سرمنشي د ځانګړي استازي د دفتر ( يوناما) مرستيال مارکس پوتزل پر نړيوالو له دې امله نیوکې کړي، چې د افغانستان له بد وضعیت سره – سره د دغه هېواد د هېرولو په حال کې ده.
نوموړي د ترکمنستان په پلازمېنه عشق اباد کې يوې غونډې ته د وینا پر مهال وويل، چې د افغانستان بشري او اقتصادي ناورين د دوام او پراختيا په حال کې دی، خو سره له دې هم دغه هېواد يوازې پريښودل شوی او د نړۍ دريځ ېې په اړه سختیږي.
د یوناما مرستيال، چې د مرکزي اسيا هېوادونو د بهرنیو چارو د مرستیالانو غونډې ته ېې خبرې کولې، له دغو هېوادونو وغوښتل څو د افغانستان قضیه د خپلو لومړیتوبونو په لیست کې شامله کړي.
د مارکس پوتزل په وینا له افغانستان سره د سیمې د هېوادونو همکاري او تعامل ځانګړی ارزښت لري.
د ملګرو ملتونو د دغه استازي څرګندونې په داسې حال کې دي، چې افغانستان څخه د ژمي له شدت سره د بشري او اقتصادي ستونزو د زیاتیدو خبرونه ورکول کیږي.
د طالبانو د حاکمې ادارې چارواکو له نړيوالو او افغان شتمنو غوښتي څو افغان فقر ځپلو سره مرستې وکړي.
د طالبانو منتقدین بيا د دوی سخت دریځۍ او نړيوالو سره د تعامل لپاره نه چمتووالی د اقتصادي ناورين د مقابلې لپاره د هڅو پر وړاندې لوی خنډ یادوي.