تاند:( سې شنبه، د قوس دوه ويشتمه) د ایران په پلازمېنه تهران کې د افغان کډوالو د وضعيت په اړه د دغه هېواد، پاکستان، ملګرو ملتونو او د افغانستان د حاکمې ادارې په ګډه غونډه کې په خپله خوښه افغانستان ته د کډوالو پر اختياري ستنيدو بحثونه وشول.
د ايران د کډوالو وزارت يوه مقام صادق رضادوست وويل، چې دغه بحث د یادې غونډې له اصلي محورونو څخه و.
سرچینه زیاتوي، په غونډه کې د افغان کډوالو د داوطلبانه ستنيدو په اړه د زمينې برابرولو په اړه ټينګار وشو.
د ايراني مقام د معلوماتو له مخې، په غونډه کې د ملګرو ملتونو د کډوالو عالي کميشنرۍ په دې تړاو د هر اړخيزو همکاريو ژمنه وکړه او ويې منله، چې ستنیدونکو کډوالو ته به لازمې اسانتياوې برابروي.
په ياده غونډه کې د ګډون په موخه د طالبانو د حاکمې ادارې د کډوالو وزارت مرستيال مولوي عبدالرحمن راشد هم تهران ته رسیدلی.
د طالبانو اړوندو رسنيو د نننۍ غونډې او پکې د طالب استازي د ګډون په اړه څه نه دي ويلي.
دا غونډه په داسې مهال شوې، چې له ایران، پاکستان، ترکېې او يو شمېر نورو هېوادونو څخه په پرله پسې ډول د افغان کډوالو پر وړاندې د ناوړه چلند راپورونه ورکړل شوي.
د طالبانو پر چارواکو نيوکه کيږي، چې د افغان کډوالو د حق غوښتنې په اړه غږ نه پورته کوي.