تاند (د قوس ۱۸ مه) د پاکستان شارژدافېر عبیدالرحمان نظاماني، چې په کابل کې د پاکستان پر سفارت له حملې وروسته پاکستان ته تلللی، د خپل هیواد د بهرنیو چارو له مرستیال وزیرې حنا رباني کهر سره ولیدل.
د پاکستاني رسنیود راپور له مخې، کهر او نظاماني د افغانستان پر حالاتو خبرې کړي دي.
د پاکستان د بهرنیو چارو مرستیال وزیرې رباني کهر هم پر خپله ټویټرپاڼه کښلي، په دې ویاړي چې پاکستان داسې دیپلوماتان لري چې په ویاړ خدمت کوي.
دې همداراز لیکلي چې د پاکستان د حکومت لپاره د خپلو دیپلوماتانو د امنیت خوندیتوب لومړیتوب لري.
د روانې دسمبر په دوهمه په کابل کې د پاکستان پر سفارت له یوې څنګلوري ودانۍ ډزې وشوې چې له کبله یې د شارژدافیر ساتونکی ټپي شو خو شارژدافیر روغ ووت.
وروسته عبیدالرحمان نظاماني د مشورو لپاره اسلام اباد ته وبلل شو چې تراوسه پورې بېرته کابل ته نه دی راګرځېدلی.
داعش د دې برید مسوولیت ومانه او د افغانستان د طالبانو حکومت وايي چې د حملې یو عامل یې نیولی دی.
پاکستان ویلي چې د طالبانو له حکومت سره د دې پېښې په اړه په ګډه څېړنې کوي.