تاند:(پنجشنبه، د قوس اوولسمه) د طالبانو د‏کورنيو چارو وزير مولوي سراج الدين حقاني په فراه کې د هغه کس له کورنۍ سره چې پرون پرې د قصاص حکم تطبيق شو، سل زره افغانۍ مرسته وکړه.

نوموړي د دغې مرستې دلیل نه دی په ډاګه کړی.

ځینې سرچینې وايي چې تاج مير له غربته وسله والې غلاوې کولې او په دې ترڅ کي د يوه کس د وژلو او لوټلو عامل شوی و.

د طالبانو ځينو منتقدانو د نوموړي د قصاص په اړه پوښتلي، چې آيا دوی د نوموړي اقتصادي وضعیت او غلا او وژنو ته یې د مجبورۍ عوامل څېړلي وو، چې قصاص ېې کړ.

د طالبانو وياندويانو په دې اړه د خلکو نیوکو ته غبرګون نه دی ښودلی.

د طالبانو ویاند ذبیح الله مجاهد پرون وویل، چې ياد شوی تورن د درېیو محکمو لخوا په قصاص محکوم شوی او قضيه ېې د طالبانو اميرالمؤمنين ته د وروستۍ پريکړې لپاره لېږل شوې وه.

 مجاهد زياتوي چې د نوموړي د قضېې په اړه د طالبانو اميرالمؤمنين په يوه لويه غونډه کې له علماوو سره مشوره کړې او بالاخره یې پر هغه د قصاص پریکړه تایید کړه.

ویل شوي، چې ياده پریکړه پرون په فراه کې د طالبانو د قاضي القضات شیخ عبدالحکیم حقاني، د رییس الوزرا د اقتصادي مرستیال ملا عبدالغني برادر اخوند، د کورنیو چارو وزیر مولوي سراج الدين حقاني، د پوهنې، امر بالمعروف او عدليې وزيرانو په موجوديت کې تطبيق او تورن قاتل د مقتول د پلار په درېیو ډزو ووژل شو.