تاند (جمعه، د ثور ۲۸ مه) د بامیان ولایت په مرکز بامیان ښار کې نن (جمعه) په یوه ترهګر برید کې لږترلږه ۲ بهرني سیلانیان وژل شوي دي.
د واشنګټن پوسټ ورځپاڼې د راپور له مخې، د طالبانو حکومت تایید کړه چې د نامعلومو وسله والو په برید کې ۳ بهرنیان وژل شوي دي.
د طالبانو د کورنیو چارو وزارت ویندوی مفتي عبدالمتین قانع ویلي چې په دې برید کې د درو بهرنیانو ترڅنګ یو افغان وژل شوی او همداراز درې افغانان او ۴ بهرنیان ټپیان شوي دي.
دا له کله چې امریکايي پوځیان له افغانستانه وتلي، او افغانستان د طالبانو تر کنترول لاندې راغلی پر بهرنیانو لومړنی برید دی.
راپورونه وايي چې په بامیان کې د وسله والو کسانو په ډزو د ۳ بهرنیو سیلانیانو په شمول ۸ تنه وژل شوي دي.
طالبانو لا هم په دې برید کې، چې نن مازدیګر وشو، د وژل شویو بهرنیانو د ملیت او هویت په اړه څه نه دي ویلي.
د طالبانو تر کنټرول لاندې د افغانستان د کورنیو چارو وزارت په یوه خبرپاڼه کې ویلي چې په دې برید کې څو تنه نور ټپیان شوي دي.
دغه وزارت د حملې په تړاو د ۴ تنو د نیولو خبر هم ورکړی دی.
تر دې مخکې ځینو رسنیو ادعا کړې وه چې په بامیان کې د نن مازدیګر په ډزو ۵ ملکي افغانان او درې بهرنیان وژل شوي دي.