تاند ( شنبه، د ثور ۲۹مه) د هرات ځايي طالب چارواکي وايي، چې د دغه ولایت په کرخ ولسوالۍ کې د یوې ترافیکي پېښې له کبله ۱۸ کسانو ته مرګ ژوبله اوښتې ده.
دغه پېښه په کرخ ولسوالۍ کې د یوه کاسټر موټر او موټر سایکل ترمنځ د ټکر له امله رامنځته شوې، چې په کې ۴ تنه مړه شوي او ۱۴ نور ټپیان شوي دي.
د دغه ولایت د حوزوي روغتون د بېړنۍ خونې مسوول ډاکټر احمدفهيم افضلي وويل، چې په دې پيښه کې مړي او ټپيان د سيمې روغتون ته ليږدول شوي دي.
چارواکو د دې پېښې د لامل په تړاو څه نه دی ویلي خو ډېری وخت دې ته د ورته پېښو لامل د موټر چلوونکو بې احتیاطي ګڼي.
څه موده مخکې د طالبانو ریاست الوزرا د ترافیکي پېښو د مخنیوي لپاره د یوې طرحې د جوړولو خبر ورکړی و، خو له دې سره بیا هم معلومه نه ده چې د دغې طرحې پایلې څه وې؟