تاند(پنجشنبه، د قوس ۱۷مه) د پاکستاني خبریال ارشد شریف د قتل د څېړنې لپاره د حقیقت موندنې کمېټې په خپل راپور کې اعلان وکړ چې نوموړی د منظم پلان له مخې وژل شوی دی.
ارشد شریف د اکتوبر په ۲۳ مه نېټه د افریقايي هیواد کینیا په پلازمېنه نایروبي کې ووژل شو.
د پاکستان د کورنیو چارو وزارت وايي، د حقیقت موندنې ټیم سترې محکمې ته په وړاندې کړي راپور کې ویلي چې په کینیا کې د شریف په قتل کې د خرم او وقار په نومونو دوو کسانو رول درلود.
خو حقیقت موندونکي ټیم ویلي چې نورو تحقیقاتو ته هم اړتیا لري.
په پاکستان کې ډیرو کسانو په دې قتل کې د پاکستان د پوځ او استخباراتو د لاس لرلو شک وکړ ځکه چې د دوی په باور دغو ادارو تر دې وړاندې هم یو شمېر خبریالان وژلي او نیولي دي.
د ډان ورځپاڼې پر اساس، د ارشد شریف مور هم محکمې ته په خپل شکایت کې د پوځ اواستخباراتو جګپوړي چارواکي د خپل زوی په قتل کې په لاس لرلو تورن کړي دي.
وروسته له دې چې د شریف د قتل موضوع په پاکستان کې تاوده بحثونه وپارول، د پاکستان حکومت د پېښې د څېړنو لپاره یو ټیم کینیا ته واستاوه. ټیم له څېړنو وروسته سترې محکمې ته ۵۹۲ مخیز راپور وړاندې کړ.
په دې راپور کې راغلي چې د کینیا پولیسو له پاکستاني ټیم سره مرسته نه ده کړې خو نړیوالو ادارو ورسره همکاري کړې ده.
راپور وايي، وقار احمد، هغه څوک چې ارشد شریف ته یې د کینیا ویزه لېږلې وه، لازم ځوابونه نه دي ویلي او د نوموړي د ورور او د کینیا د پولیسو څرګندونې ضد و نقیضې وې.
د کینیا پولیسو د پېښې په لومړیو ساعتونو کې ویلي و چې دوی سهواً پر هغه موټر ډزې وکړې چې ارشد شریف پکې سپور و.
د پاکستان سترې محکمې ته په وړاندې شوی راپور کې ویل شوي چې ارشد شریف ته بیلابیل خبرداري ورکړل شوی و لکه دا چې په پاکستان کې به ورته دوسیه جوړه کړل شي، وبه وژل شي، او موبایل او لپ ټاپ به ورڅخه واخیستل شي.
په راپور کې بل د پام وړ مهم ټکی دا دی چې د ادعا له مخې د ارشد شریف پر موټر ډزې شوي خو په موټر کې د ډزو هیڅ نخښه نه ده لیدل شوې.