تاند(دوشنبه، د قوس ۱۴ مه) د طالبانو د حکومت د دفاع سرپرست وزیر ملامحمدیعقوب مجاهد، چې متحده عربي اماراتو ته په سفر تللی، د دغه هیواد له رييس شیخ محمد بن زید النهیان سره وکتل.
د رویټرز خبري اژانس د راپور له مخې، دوی د افغانستان او متحده عربی اماراتو ترمنځ د اړیکو، دوه اړخیزو همکاریو او نورو مهمو مسلو په اړه خبرې وکړې.
د متحده عربي اماراتو دولتي خبري اژانس (وام) وايي، د طالبانو د دفاع وزارت سرپرست د متحده عربي اماراتو له رييس سره پرون یکشنبه په ابوظهبي کې د امیر په ماڼۍ کې وکتل.
د متحده عربي اماراتو خبري اژانس د اماراتو له ريیس سره د طالبانو د دفاع وزیر عکس هم خپور کړی.
په دې کتنه کې له ملایعقوب مجاهد سره انس حقاني هم حضور لري.
په سپټمبر کې د طالبانو حکومت د متحده عربي اماراتو له یوې کمپنۍ (GAAC) سره د افغانستان د هوايي ډګرونو په اړه یو قرارداد لاسلیک کړ.
قطر او ترکیې هم دې قرارداد ته لېوالتیا لرله.