تاند:(جمعه، د قوس يوولسمه) د طالبانو د ریاست الوزراء سیاسي مرستیال مولوي عبدالکبیر په کابل کې د حزب اسلامي د مشر انجنیر ګلبدین حکمتیار پر دفتر نننی برید غندلی.
نوموړي په دې اړه خپره کړې اعلامیه کې ویلي، چې د افغانستان دښمنان هڅه کوي په دې ډول بریدونو سره د افغانانو ترمنځ نفاق رامنځته او په هېواد کې وېره خپره کړي.
نوموړی زیاتوي:«له نیکه مرغه چې افغانان، د دښمنانو او شریرو عناصرو پر دې شومو موخو ښه خبر دي او دا بریدونه نشي کولای د دوی ترمنځ تفرقه رامنځته کړي.»
مولوي کبير له حکمتیار سره د خواخوږۍ تر څنګ ويلي،چې دوی به د دې ډول پېښو د مخنیوي لپاره خپلې هڅې لا ډېرې کړي.
د طالبانو دغه لوړپوړي مقام زياته کړې:«امنیتي ځواکونه مسؤولیت لري چې د ټولو افغانانو امنیت خوندي کړي؛ خو د دې ډول بریدونو د مخنیوي لپاره له خلکو غواړو له امنیتي ځواکونو سره همکاري وکړي.»
د طالبانو په دې اعلاميه کې زياته شوې، چې په دې برید کې د حکمتیار یو ملګری وژل شوی اودوه نور ملګري ټپیان شوي.
د يادې پېښې مسووليت چا پر غاړه نه دی اخیستی، خو ويل شوي چې برید دوو بريدګرو کړی، چې دواړه وژل شوي دي.
نامعلومو وسله والو نن په کابل کې د پاکستان پر سفارت هم ډزې کړي او د لومړنیو معلوماتو له مخې، په دې پېښه کې لږترلږه یو تن ټپي شوی دی.
راپورونه وايي چې د حملې هدف د پاکستان شارژدافیر عبدیالرحمان و خو نوموړی له حملې روغ وتلی دی.