تاند(دوشنبه، د قوس ۷ مه) د افغانستان پخوانی ولسمشر حامد کرزی وايي، له هیواده بهر ته د کوم سفر پلان نه لري.
د پخواني ولسمشر مطبوعاتي دفتر د رسنیو د هغو خبرونو په غبرګون کې چې د حامد کرزي د بهرنیو سفرونو بندیز پای ته رسیدلی او نوموړی په راروانه دسمبر میاشت کې جرمني ته ځي، ویلي چې ښاغلی کرزی بهر ته د تلو اراده نه لري.
مخکې رسنیو حامد کرزي ته د نژدې سرچینو پر اساس ویلي و چې د طالبانو حکومت پر حامد کرزي د سفر بندیز پای ته رسولی دی.
ځینو رسنیو حتي ویلي و چې حامد کرزی نارغ دی او د درملنې لپاره جرمني ته ځي.
د سولې د عالي شورا د پخواني ريیس عبدالله عبدالله په اړه هم رسنیو ویلي وو چې پر سفر یې بندیز لګول شوی خو عبدالله په ځلونو د خپلې کورنۍ د غړیو د لیدو لپاره هند ته تللی او بېرته کابل ته ستون شوی دی.