نننۍ ډیجټلي نړۍ په اسانۍ سره زموږ د بدن اساسي برخه (سترګي) اغیزمنوي. زموږ د سترګو دید په داسې ډول سره کموي، چې ممکن موږ پرې هیڅ پوه هم نشو؛ خو له سترګو به خلاص یو.
سردرد، د سترګو سوخت او وچوالی او د سترګو څخه د اوښکو او نم بهیدل د سترګو د کمزوري کیدو لومړۍ نښې نښانې دي؛ خو زموږ او ستاسې څخه ډیر خلک دا نښې بابیزه ګڼي.
د سترګو ناروغي هیڅکله هم ساده مه بولئ. سترګې د وجود هغه عضوې دي، چې که په وخت يې غم ونه خوړل شي، په تدریجي ډول له زوال سره مخ کیږي.
وخت نا وخت د سترګو ډاکتر ته ورتلل او د سترګو معاینه کول بې ګټې نه ده؛ خو دلته موږ تاسې ته ځینې داسې ګټورې طبعي لارې چارې در په ګوته کوو، چې ستاسې سترګې به د دید له کمزورۍ څخه وساتي.
۱ـ زیاتې اوبه وڅښئ.
په وجود کې د اوبو کمبود د سترګو ګاټي او د سترګو داخلې برخې وچې ساتي، چې ورسره د سترګو ناروغۍ پیدا کیږي.
د ورځې تر ۸ ګیلاسونو او یا هم تر دې زیاتې اوبه څښل سترګې پاکې، روغې او جوړې ساتي.
د یادونې وړه ده، چې د ډیرو اوبو څښل، د عمومي روغتیا، پوټکي نورې روغتیا لپاره هم ګټورې دي.
۲ـ تازه میوه او شنه سبزي:
شنه او تازه سبزي او میوه جات د سترګو غذايي اړتیاوې پوره کوي او د سترګو د کمزورۍ په وړاندې مبارزه کوې. تازه میوه او شنه سبزي د سترګو ناروغۍ په لویه کچه راټیټوي او د سترګو دید زیاتوي.
۳ـ د سمارټ فون او کمپیوټر د کارونې په وخت سترګو ته دمه ورکړئ.
په مکرر ډول د لیپټاپ او سمارټ فون کارونه سترګې ستړې او خربوي. د سمارټ فون، کمپيوټر او نورو الکټرونیکي وسایلو د استعمال په وخت سترګو ته دمه ورکړئ.
د ۲۰ – ۲۰ – ۲۰ فارموله به تاسې سره مرسته وکړي، چې سترګې مو جوړې پاتې شي. دا فارموله ساده ده: هر ۲۰ دقیقې وروسته، ۲۰ فوټه لري، د ۲۰ ثانیو لپاره وګورئ.
۴ـ سیګرېټ څکول پریږدئ.
سیګرېټ څکول د سترګو اوبه ختموي او د سترګو وچوالی پیدا کوي. نو که غواړئ، چې سترګې مو روغې، ښکلې او قوي دید ولري، سیګریت مو همدا اوس مړ کړئ او بیا يې هیڅکله مه بلوئ.
۵ـ د لمر ضد عینکې په سترګو کوئ.
د ګرمۍ پر مهال د لمر تیزې وړانګې ستاسې سترګې په اسانۍ سره زیانمولای شي؛ خو که د لمر ضد عینکۍ په سترګو کړئ، سترګې به مو د لمر د زیان رسوونکو وړانګو څخه په امان وي.
د سترګو د دید لپاره ویټامین لرونکي خواړه حتمن په خپلو ورځنیو خوړو کې شامل کړئ؛ په ځانګړي ډول د A، C، او E ویټامین لرونکي خواړه ډير خورئ.