تاند:( يکشنبه، د عقرب نهه ويشتمه) د ازبکستان د بهرنیو چارو وزیر «ولادیمیر نوروف» ټینګار کړی، چې نړيواله ټولنه بايد افغانستان له ياده ونه باسي او د افغانستان حاکمه اداره باید د نړيوالو غوښتنو ته درناوی وکړي.
نوموړي په تازه څرګندونو کې زياته کړې، چې د طالبانو حاکمه اداره باید د پراخ بنسټه حکومت، د ښځو او اقليتونو د حقونو د درناوي او ترهګرۍ سره د مبارزې په برخه کې د نړیوالو غوښتنو ته غاړه کېږدي.
د ازبکستان د بهرنیو چارو وزیر زياتوي، چې هېواد ېې هم له طالبانو همدا غوښتنې لري او د عملي کیدو ټینګار یې کوي.
د ازبکستاني وزير په وینا، افغانستان د ننګونو نه، بلکې فرصتونو هېواد دی، خو په دې شرط چې دغه فرصتونه په سمه توګه درک او استفاده ورڅخه وشي.
دا څرګندونې په داسې حال کې دي، چې د طالبانو منتقدین دوی د نړیوالو له بشري مرستو او نورو همکاريو سره- سره له خپلو سخت دریځو سياستونو په نه شاتګ تورنوي او په خاص ډول د شاوخوا درې میلیونه نجونو پر مخ د ښوونځيو د دروازو بندول د نه زغملو وړ عمل بولي.