تاند:(پنجشنبه، د عقرب نولسمه) د پښتونخوا په مرکز پېښور کې د مفکوره په نوم یوه فرهنګي مرکز ځوانانو ته د موسیقۍ آلاتو د زده کړو لړۍ پیل کړه.
د دغه مرکز مشر حیات روغانی وايي چې د دغه کار هدف د پښتو موسیقۍ د ودې لپاره د ښو هنروالو روزنه ده.
د نوموړي په وينا، په دې روزنيزه لړۍ کې د کوزې او برې پښتونخوا د موسيقۍ مختلف استادان ځوانانو ته د موسیقۍ روزنه ورکوي.
د موسيقۍ څېړونکو دا ګام ستایلی او ویلي، په داسې شرايطو کې چې په افغانستان کې د طالبانو ادارې موسيقي او هنر منع کړي، پښتونخوا ته بیا د پښتو موسیقۍ او هنرونو د ژوندي ساتلو لپاره د ډېرو هڅو سترګې اوړي.