تاند:(پنجشنبه ،د عقرب نولسمه) د طالبانو تر کنټرول لاندې د افغانستان بانک سرچينو کابل ته د نويو چاپ شويو افغاني بانکنوټونو د لومړۍ جوپې د رسېدو خبر ورکړی.
د دغو تازه رسیدلو پيسو شمېر تر اوسه نه دی په ډاګه شوی.
ځينو باوري سرچينو تاند ته ویلي، چې افغانستان د جمهوري نظام له سقوط څخه مخکې هم د بانکنوټونو له کمښت سره مخ و او افغانستان بانک ېې د چاپ هڅه کوله.
د سرچينو د معلوماتو له مخې، نوي چاپ شوي بانک نوټونه هم د هماغو هڅو دوام دی او په ډېر ګومان نوي بانکنوټونه د افغانستان د مخکینیو چارواکو له لاسلیکونو او د جمهوري نظام له نوم سره چاپيږي.
طالب چارواکو په دې اړه څه نه دي ويلي.
د تازه چاپ شويو افغاني بانکنوټونو ټول شمیر شاوخوا ۳ میلیارده ښودل شوی.
د افغانستان لپاره د امريکا ځانګړي استازي ټام ويسټ څه موده مخکې وويل، چې د افغانستان نوي بانک نوټونه د دوی په همکارۍ په پولینډ هېواد کې چاپ شوي دي.
د نویو بانکنوټونو د چاپ له اعلان سره هم مهاله، د ټولنیزو رسنیو يو شمېر فعالانو د یوه کمپاين له ترسره کولو سره له خلکو غوښتي چې د پیسو د ښې ساتنې لپاره جیبي بټوې وکاروي او په دې برخه کې خپل ملي مکلفیت تر سره کړي.