تاند:(چار شنبه ،د عقرب اتلسمه) نړیوال سره صليب ادارې د ژمي له رارسيدو سره د افغانانو د ژوند په شرایطو کې د لا ډېرو ستونزو خبرداری ورکړی او بيا يې ۲۴ میلیونو خلکو سره د عاجلو مرستو غوښتنه کړې ده.
دغې ادارې ويلي، چې سمدستي د هغو افغانانو شمېر ۲۰ ميليونه دی، چې کافي خوړو ته لاسرسی نه لري.
نړيوال سره صليب د هغو افغانانو شمېر ۲۴ ميليونه ښودلی، چې عاجلې بشري مرستې ورسره ضرور دي.
د یادې ادارې په تازه اعلامیه کې ښځې او یتیمان د افغانستان د روان بشري ناورين تر ټولو ډېر ځپل شوي قشرونه ګڼل شوي.
د نړیوال خوراکي پروګرام په یوه تازه راپور کې څه موده مخکې ویل شوي، چې د څه باندې ۱۹ میلیونه افغانانو خوراکي رژیم نا مناسب او له معیاره لویدلی.
له دې کبله د ۳۴ زرو خوار ځواکۍ ځپلو ماشومانو د بستر کیدو خبر هم ورکړل شوی.
تازه د طالبانو د رییس الوزرا سياسي مرستيال مولوي عبدالکبیر له شتمنو غوښتي، چې په ژمي کې کونډو او یتیمانو سره مرستو ته پاملرنه وکړي.
د طالبانو چارواکو مخکې د بشري ناورين په اړه نړیوال راپورونه ردول او د ځان په خلاف تبلیغات بلل، خو په وروستيو کې دوی هم افغانانو سره عاجلې مرستې غواړي.