دوشنبه, فبروري 26, 2024
Homeخبرونهد ط-انو بهرنيو چارو وزارت د روسیې غونډه کې خپل نه ګډون...

د ط-انو بهرنيو چارو وزارت د روسیې غونډه کې خپل نه ګډون ته غبرګون وښود

تاند:(شنبه ،د عقرب څوارلسمه)‏‌ په افغانستان کې د طالبانو د حاکمې ادارې د بهرنیوچارو وزارت د روسیې هغه اعلان ته غبرګون وښود، چې وايي د افغانستان په اړه د روسیې فارمټ په نوم جوريدونکې غونډې ته د طالبانو استازي نه ور غواړي.

دغه وزارت په یوه اعلامیه کې ویلي:« په روسیه کې د افغانستان په اړه د جوړېدونکې غونډې بحثونه به نیمګړي وي.»

 سرچينه زياتوي، چې په دې ډول غونډو کې د طالبانو نه ګډون به له نړیوالو سره د دوی پر تعامل ناوړه اغېز وکړي.

روسي رسنیو د افغانستان لپاره د روسیې د ځانګړي استازي ضمیرکابلوف له قوله خبر ورکړی چې په پام کې ده د روانې نوامبر میاشتې په نیمايي کې د افغانستان په اړه د مسکو د فارمټ په چوکاټ کې د روسیې، چین، هند، ایران او د منځنۍ آسیا د پنځو هېوادونو په ګډون یوه غونډه جوړه شي.

د ياد شوي فارمټ تېری غونډې ته د طالبانو د رييس الوزرا اداري مرستیال مولوي عبدالسلام حنفي بلل شوی و.

 د طالبانو اداره پر افغانستان له نژدې پنځلس میاشتنۍ واکمنۍ سره سره تراوسه د نړیوالو له خوا په رسمیت نه دی پېژندل شوی.

څو ورځې مخکې ‏‌ د روسیې د ملي امنیت شورا منشي نیکولای پتروشیف امریکا متحده ایالات تورن کړل،‌ چې د خپلو سیاسي- جغرافیوي موخو لپاره یې د طالبانو، القاعدې او داعش ډلې رامنځته کړي دي.

روسيې دغه راز اعلان کړی، چې د طالبانو حاکمې ادارې ته ېې د روسیې فارمټ په نوم د افغانستان په اړه کيدونکې سیمه ییزه غونډه کې د ګډون فرصت نه دی ورکړی.

شنونکي باور لري، چې د طالبانو او امریکا وروستي مذاکرات د طالبانو د ادارې پر وړاندې د روسیې او نورو سیمه ییزو هېوادونو د دريځونو د سختیدو سبب شي.

د طالبانو له بيا ځلي واکمنۍ څخه مخکې د دوی پر وړاندې د سیمې او امریکا تر منځ په اړيکو کې انډول ساتل له لویو ننګونو څخه ګڼل کیده.

امريکا ته د طالبانو د نیږدې کیدو ځینې مدافعین دې ته په اشارې سره، چې د سیمې قدرتونو د طالبانو د بيا ځلي واکمنۍ په څه باندې یو کلنه موده کې د امریکا د يوې اونۍ هومره مرسته د دوی واکمنۍ سره نه ده کړې، امريکا ته د طالبانو د نیږدې کیدو ننګه کوي.

له دې سره څېړونکي وړاندوينه کوي، چې امریکا ته د طالبانو له ډېر نیږدې کیدو به دوی ته تاوان دا وي، چې د سیمې هېوادونه ېې ښايي پر ضد نورو ډلو نه ملاتړ وکړي.

1 COMMENT

  1. که په رښتیا طالب او ینکي سره نږدې شي نو پاکستان به د طالب غلامي کوي او په دې صورت به هیڅ نور ګاونډي هېوادونه د مداخلې قدرت ونلري ! خو مذهبي منا فقین باید زما د نازولیو نجونو ښوونځي را خلاص کړي !! طالب منافقت کوي او منافقت ددین سره خیانت دی!

LEAVE A REPLY

Please enter your comment!
Please enter your name here

- Advertisment -

ادب