راپور: راحت زيارمل
تاند (شنبه، ۱۴ جدي ۱۳۹۸) د جلال اباد ښار په زړه سراج العمارت بڼ کې ورزشي خبریالانو د افغانۍ د رایجولو په موخه کرکټ سیالۍ پیل کړې چې دوه ورځې به دوام ولري.
په دغو سياليو کې د ننګرهار او کابل ولايت د ورزشي خبريالانو درې لویډلې ګډون لري چې خلکو ته د افغانيو د کارونې پيغام ورکوي.
د دغو سياليو جوړونکو د لوبغالي په څنډو کې د افغانۍ د ترويج لپاره شعارونه هم راځړولي وو چې پکې ليکل شوي وو: ” راځئ پردۍ اسعارو ته [نه] ووايو او د خپلې ملي کرنسۍ پر کارولو د هېواد اقتصاد په پښو ودروو”.
په دغو سياليو کې د ننګرهار والي شاه محمود مياخېل وينا وکړه او د ورزشي خبريالانو دغه اقدام يې وستايه. ښاغلي مياخېل وويل: “د افغانيو رواجول يوه ننګوونکې پروسه ده، خو د خلکو او اقشارو ټينګ هوډ او ونډې دغه پروسه په ډېره ښه توګه روانه کړې ده. هر هېواد ځان ته وياړونه او د هوېت شاخصونه لري چې زموږ يو مهم شاخص افغانۍ دي”.
د ننګرهار يو تن ورزشي خبريال اباسين امرخېل د دغو لوبو د موخې په اړه وايي چې دوی خلکو ته د افغانۍ د کارونې او د بهرنيو اسعارو د مخنيوي په موخه د عامه پوهاوي په توګه دغه لوبې پیل کړې دي. هغه وويل: ” موږ په ټولو هغو ټولنيزو مسايلو کې ونډه اخلو چې د هېواد او ولس پکې خير وي. افغانۍ زموږ ملي هويت دی او د دې په رايجولو کې ونډه اخيستل موږ خبريالان خپل مسووليت ګڼو”.
دا سیالۍ په جلال اباد کې په داسې مهال کې روانې دي چې د مرغومې له لومړۍ نېټې په ننګرهار او يو شمېر نورو ولايتونو کې د افغانيو د ترويج او بهرنيو اسعارو د مخنيوي پراخ ولسي کمپاين پیل شوی دی.