تاند:(دوشنبه ،د عقرب نهمه) د افغانستان يو شمېر پخوانیو امنيتي چارواکو او د پاشل شويو امنيتي ځواکونو ملاتړو په ټویټر کې د دغو ځواکونو د ژغورنې په هدف کمپاین پیل کړی.
د کمپاين ګډونوالو د SaveAfghanSoldiers# ټرينډ له استعمال سره خبر ورکړی، چې د طالبانو حاکمې ادارې د جمهوري نظام د امنيتي او دفاعي ځواکونو د وژلو، شکنجې او ځورولو لپاره خپل اقدامات زیات کړي.
د جمهوري نظام د امنيتي او دفاعي سکتور وياند جنرال اجمل عمر شینواري هم په دغه کمپاين کې ګډون کړی او لیکلي، چې طالبانو د افغان وسله وال پوځ د منسوبينو مرموزو وژنو څپه ګړندۍ کړې ده.
د ټولنیزو رسنیو ډیرو دغو فعالانو، چې له هېواده بهر ژوند کوي، له نړیوالو غوښتي چې د افغان ځواکونو د ژغورلو لپاره د طالبانو پر حاکمې ادارې فشار راوړي.
د طالبانو ادارې بیا په دې اړه ادعاوې رد کړي او ويلي، چې لا هم د جمهوري نظام يو شمېر پوځي او امنیتي منسوبین دندې ورسره لري.