تاند:(يکشنبه ،د عقرب اتمه) په بلجیم کې د پناه غوښتونکو يوې مدافع ډلې د افغان پناه غوښتونکو د ژوند د سختو شرايطو خبر ورکړی.
د يوه اړوند بنسټ مسوول فداسیل ويلي، چې يو شمېر افغان پناه غوښتونکي د سړکونو پر سر پريښودل شوي، چې وضعیت یې د اندیښنې وړ دی.
دغې ادارې د بلجيم حکومت د کډوالو د حقونو په اړه د خپلو ژمنو په نقض تورن کړی او ترې غوښتي، چې دغه حقونه تامين کړي.
د کډوالو د حقونو فعالانو د ژمي له رارسيدو سره د کډوالو د ستونزو د زیاتیدو خبرداری هم ورکړی.
د ياد شوي خيريه بنسټ مسوول ويلي، چې دوی هره مياشت له دوو تر دوه نیمو زرو کډوالو ته د امکاناتو برابرولو وسه لري، په داسې حال کې چې تر څلورو زرو زيات کډوال د مرستې غوښتنلیکونه ورسره شريکوي.
د بلجیم چارواکو په دې اړه څه نه دي ويلي.
د یادونې وړ ده، چې شاوخوا یو کال مخکې دغه هېواد د نويو افغان کډوالو د نه منلو په اړه خپل پریکنده دریځ اعلان کړی و.