تاند(جمعه، د عقرب ۶ مه) د طالبانو حکومت وايي چې په بادغیس ولایت کې یې د ګازو یوه بله زېرمه موندلې ده.
د طالب چارواکو په وینا دا زېرمه د بادغیس ولایت په قادس ولسوالۍ کې کشف شوې او د کانونو وزارت یو پلاوی سیمې ته د سروې لپاره استول شوی دی.
دا د ګازو دوهمه زېرمه ده چې په وروستیو ورځو کې په بادغیس ولایت کې موندل کېږي.
دوې ورځې وړاندې د بادغیس په بالامرغاب ولسوالي کې، چې له ترکمنستان سره په پوله کې پرته ده، د ګازو یوه زېرمه کشف شوې وه.
د سیمې اوسېدونکي وايي چې له ډېر پخوا څخه یې داسې نښې لیدلې وې چې په دغو سیمو کې ګاز شته.
تراوسه پورې د تازه کشف شویو ګازو د اندازې او د ساحې د پراخوالي په اړه څه نه دي ویل شوي خو طالبان وايي چې د کانونو او پیټرولیم وزارت تخنیکي پلاوی ساحې ته لېږل شوی چې نورې څېړنې او ارزونې وکړي.
تر دې وړاندې په جوزجان ولایت کې ګاز کشف شوي وو او د محمدداوود خان د حکومت په وروستیو کلونو کې په زیاته پیمانه پخواني شوروي اتحاد ته صادرېدل.
عموماً په کومو ځایونو کې چې ګاز وي هلته تېل هم وي.
د امریکا د متحدو ایالتونو د هغې سروې له مخې چې په۲۰۱۹ کې یې وکړه، د افغانستان د ګازو اندازه کابو ۱۶ تریلیون فوټ مکعبو ته رسیږي.