تاند:(چار شنبه ،د عقرب څلورمه) له کابل څخه قطر ته د افغان پناه غوښتونکو د لېږد له بهیره با خبره سرچينو د دغه بهير د موقت ځنډ خبر ورکړی.
اين بي سي ټلویزیون د دغو سرچينو له قوله ویلي، چې د دغه ځنډ دليل په قطر کې د فوټبال د نړېوال جام د سياليو تر سره کيدل دي.
ویل شوي، چې د دغو سياليو له امله به تر راتلونکې جنورۍ میاشتې د افغان پناه غوښتونکو د لېږد دغه بهیر وځنډیږي.
امریکايي چارواکو این بي ايس تلويزيون ته ويلي، چې له موقتي ځنډ څخه وروسته به د پلان شویو افغان پناه غوښتونکو د لېږد بهير ته دوام ورکړي.
د قطر په ګڼو پنډغالو کې زرګونه افغانان، چې د طالبانو له واکمنيدو سره یې ژوند په خطر کې ګڼل کېږي، له کابله په دې نيت مېشت شوي، چې امريکا او نورو ملګرو هېوادونو ته یې یوړل شي.
د طالبانو چارواکو په دغو کمپونو کې د افغانانو د بشري حقونو د نقض ادعا کړې او په هېواد کې ېې دوی او نورو خلکو ته د خطرونو د موجودیت خبرې رد کړي.