تاند(چهارشنبه، د قوس ۵ مه) فارن پالیسي خپرونې په یوه راپور کې د بیلابیلو افغان او بهرنیو سرچینو په قول راپور ورکړ چې روسیې د افغانستان د پخواني جمهوري نظام له کومانډو ځواکونو سره تماسونه نیولي او هغوی ته یې وړاندیز کړی چې د اوکراین خلاف په جګړه کې د روسي ځواکونو مرسته وکړي.
خپرونه د ګڼو افغان پوځي او امنیتي سرچینو په قول وايي، روسیې د افغانستان له هغو کومانډو او ځانګړو ځواکونو سره تماسونه نیولي دي چې د ۲۰۲۱ په اګست کې له افغانستانه د امریکايي پوځیانو له وتلو وروسته په میدان پرېښودل شول.
فارن پالیسي لیکي، دا ځواکونه، چې امریکا او متحدانو یې په تېرو شلو کلونو کې روزلي، روسیې ته د اوکراین پر ضد د جګړې د وضعیت د بدلولو لپاره پکار دي.
تر دې مخکې ځینو رسنیو ویلي و چې د ایران حکومت له هغو افغان کومانډو او ځانکړو ځواکونو سره تماسونه نیولي چې د طالبانو له واک ته رسیدو وروسته یې ایران ته پناه وړې ده. د دغو رسنیو پر اساس ایراني چارواکو افغان کومانډو او نورو پخوانیو پوځیانو ته ویلي چې که د اوکراین جګړې ته لاړ شي د معاش ترڅنګ به د روسیې تابعیت هم ترلاسه کړي. د فارن پالیسي پر اساس د ۲۰۲۱ په اګست کې له افغانستانه د امریکايي پوځیانو له وتلو وروسته له ۲۰ زره تر ۳۰ زره کومانډو په افغانستان کې پاتې شول. د جمهوري نظام له پرزېدو وروسته یوازې څو سوه جګپوړي کومانډو له افغانستان څخه وایستل شول.
د خپرونې له راپور سره سم، زرګونه افغان کومانډو د طالبانو د تعقیب له ډاره ګاونډیو هیوادونو ته وتښتېدل. هغوی چې په هیواد کې پاتې دي، اکثره له دې بېرې چې وبه نیول شي او وبه وژل شي، پټ دي.
د امریکا متحدو ایالتونو د افغانستان پر ملي دفاعي او امنیتي ځواکونو شاوخوا ۹۰ میلیارد ډالره لګولي وې.