تاند:(دوشنبه ،د عقرب دويمه) د نورستان چارواکو په دې ولايت کې له سلو کورنیو سره د ملګرو ملتونو د کډوالو عالي کميشنرۍ له لوري د لمریزې بريښنا د وسايلو د مرستې خبر ورکړی.
د نورستان د کډوالو چارو آمریت لپاره د طالبانو سرپرست مولوي رحمت خان ويلي، چې د هرې کورنۍ لپاره د مرستې پر برابرې شوې بستې شاوخوا ۵۰ زره افغانۍ مرسته شوې ده.
د مرسته اخیسوتکو له ډلې یو تن رفیع الله د دغه مرستې په ترلاسه کولو خوښي وښوده او زیاته یې کړه ،چې له دې وړاندې دوی بريښنا نه لرله .
د نورستان ګڼ نور خلک هم تر اوسه کافي برېښنا نه لري.
په وروستيو کې د يو شمېر کوچنيو برېښنا کوټونو د فعالېدو تر څنګ د نړيوالو مؤسساتو له لوري خلکو ته د لمريزې برېښنا د وسایلو د برابریدو هڅې زیاتې شوي.
نورستان له کونړ سره څنګ ته پروت ولايت دی، چې د ځايي خلکو په وینا پر کونړ سیند د بريښنا کوټ له جوړیدو سره د دغه ولايت په ګډون ډېرو نورو سیمو ته هم د بريښنا اسانتيا رامنځته کیدای شي.