تاند:(يکشنبه ،د عقرب لومړۍ) د طالبانو خبري سرچينو خبر ورکړی، چې په سويلي زون کې د دوی محکمې د سرې مياشتې ادارې دوه ځايي چارواکي د محاکمې پر مهال له دندو ګوښه او په يو – يو مياشت بند محکوم کړي دي.
د عزم نیوز په نوم د طالبانو يوې وېبپاڼې په خپل ټویټر کې لیکلي، چی له محاکمه شویو چارواکو څخه يو تن یې د کندهار د سرې مياشتې رئيس او بل د زون په کچه د سرې میاشتي مسئول و.
سرچینه زیاتوي:« یادو مسئولینو د اسلامي امارت د مشرتابه فرمان پنځه میاشتي ځنډولی و او د همدې غفلت په پایله کي له دندو ګوښه او په زندان محکوم شول.»
د طالبانو ياده سرچينه ليکي:« دغه پریکړه نن ورځ د ستري محکمې مرستیال او د زون په کچه د تمیز رئیس شیخ مولوي سردارمحمد ابوالفیضان صاحب په مشرۍ، چي د تمیز د دېوانونو رئیسان، د مرافعه محکمې رئیس مولوي محب الله صاحب او د نظامي محکمې قاضي هم شامل وه، ترسره شوه.»
د طالبانو سترې محکمې او وياندويانو په دې اړه څه نه دي ويلي.
معلومه نه ده، چې محاکمه شوي چارواکي له جمهوري نظام څخه د طالبانو په اداره کې پر دندو پاتې او که د نورو ډېرو چارواکو په شان دوی په خپله يو کلنه واکمنۍ کې نوي ټاکلي وو.
یادو کسانو پر دوی د لګول شويو تورونو په اړه څه نه دي ويلي.
د دې محاکمې خبر په داسې حال کې ورکړل شوی، چې د طالبانو پر محکمو د نورو ادارو په شان ېې د قانوني منابعو او لومړیتوبونو د نه مشخص والي له امله یې نیوکې کیږي.
تازه په ولسي جرګه کې د کندهار یوه پخواني استازي لالي حميدزي په کندهار کې د طالبانو والي حاجي يوسف وفا او ځینې نور چارواکي د جنرال رازق د خپلوانو او قوميانو (اڅکزيو) په وژلو او ربړولو تورن کړي او ويلي، چې دا هر څه په کندهار کې د طالبانو د امیرالمؤمنین ملا هبت الله اخندزاده د موجودیت له ادعاوو او د هغه لخوا د طالبانو د ټولو دښمنانو د بښنې له فرمان سره تر سره کیږي.
طالبانو بیا په دې اړه تورونه رد کړي او د بهرنيو چارو وزارت سياسي مرستيال ېې عباس ستانکزي پرون ویلي، چې د دوی له واکمنيدو سره وژنې، اختطاف او په زندانونو کې شکنجې صفر درجې ته رسیدلي.
طالب د پښتنو د بی عزتی، سپکاوی او قتل عام پروژه ده . دوی شل کاله پښتانه له کار ، مکتب، تجارت او آبرومند ژوند څخه محروم کړل ، ښه شو چی اوس کرزی ته هم ثابته شوه