تاند:(يکشنبه ،د عقرب لومړۍ)‏‌ ايراني چارواکو ويلي، چې د طالبانو د اوبو او برېښنا وزارت چارواکو سره ېې د کابل د شاه و عروس بند د جوړولو په چټکتیا کې د همکارۍ ژمنه کړې ده.

د ایران د سپاه پاسداران استخباراتي ادارې اړوند تسنیم خبري اژانس په یوه راپور کې لیکلي، چې په دې اړه په کابل کې د ایران د سفارت سرپرست حسن شیرازي د طالبانو د اوبو او برېښنا وزارت له مرستيال مولوي مجبب الرحمن اخندزاده سره لیدلي.

معلومه نه ده، چې ايران ولې د افغان اوبو د نه د مدیریت له دې پروژې سره همکارۍ ته لېواله دی.

ايران د افغانستان له اوبو څخه تر هر هېواد ډېر وړيا ګټه اخيستونکی هېواد بلل کېږي.

د دغه هېواد یو شمېر چارواکو او رسنيو څو ځله خبر ورکړ، چې د کمال خان بند اوبه ورته طالبانو ور خوشې کړي، خو طالبانو ظاهرا دا راپورونه رد کړي وو.

د چارو یو شمېر شنونکي باور لري، چې ایران او نور هېوادونه د طالبانو د حاکمې ادارې د نه مشروعیت له ستونزې ناوړه ګټه اخلي او پر دغې ادارې خپل شرطونه په اسانۍ مني.

د طالبانو چارواکو بیا ایران ته د کمال خان بند د اوبو خوشې کیدو راپورونه رد کړي او ايران سره ېې په دې برخه کې د پټو معاملو تورونه ېې بنسټه ګڼلي دي.

د یادونې وړ ده، چې د کابل شاه و عروس بند څخه ۲۲ کيلومتره لېرې او د شکر درې ولسوالۍ اړوند کیږي.