تاند:(دوشنبه ،د ميزان ۲۵مه) له کندهار څخه پروسس شوې وچې مېوې پر هند، پاکستان، ایران او متحدو عربي اماراتو سربېره د تاجکستان بازارونو ته هم صادرېږي
د طالبانو تر کنټرول لاندې باختر خبري اژانس د يادې فابريکې د جوړیدو وخت نه دی مشخص کړی، خو وايي د ۱.۵ میلیونه ډالره لګښت پرې شوی.
په دغه فابریکه کې شاوخوا ۲۰۰ کارکوونکي د وچې مېوې د پروسس په بېلابیلو برخو کې کار کوي.
د فابریکې مشر جمیل افغان وايي، د ورځې تر ۵ ټنو پورې انځر، شکرپاره، آبجوشي، ممیز او ځېره پر نړيوالو معيارونو پروسس کوي.
په ورته وخت کې د کندهار د سوداګرۍ خونې مرستیال عبدالباقي بینا وايي، چې په نړيوالو بازارونو کې د پروسس شوې وچې او تازه مېوې غوښتنه کېږي، چې د استولو امکانات یې موجود دي.
کندهار د تېرې شل کلنې جګړې پر مهال د افغانستان له تر ټولو ډېرو ځپل شويو سيمو څخه و، چې هره ورځ د وژلو او ورانولو خبرونه ترې خپریدل.