تاند:(دوشنبه ،د ميزان ۲۵مه) د افغانستان په ۲۲ ولایتونو کې د پوليو يا ګوزڼ پر وړاندې د شاوخوا ۶ نیم میلیونه ماشومانو د واکسین کمپاین پیل شو.
د طالبانو تر کنټرول لاندې د روغتیا وزارت چارواکو ويلي،چې دغه کمپیاین د نړيوالو مرستندويانو په مرسته پیل شوی، چې څلور ورځې به دوام وکړي.
سرچينه زياتوي، چې د طالبانو له بيا واکمنيدو سره تر دې دمه د پولیو پرضد د واکسین دا شپږم کمپاين دی، چې تر سره کیږي.
د روان میلادي کال له پیله تراوسه د افغانستان په پکتیکا او کونړ ولايتونو کې د پولیو په مرض دوه اخته ماشومان ثبت شوي.
په پام کې ده، چې په تازه پیل شوي کمپاين کې له پینځو کلونو څخه کم عمره ماشومان واکسين شي.
د طالبانو له لوري د عامې روغتيا ټاکل شوي وزير ډاکټر قلندر عباد له ټولو کورنيو غوښتي، چې خپل ماشومان د پولیو پرضد واکسين کړي.