تاند:(یکشنبه ،د ميزان ۲۴مه) د طالبانو د حاکمې ادارې له لوري پاسوال مولوی عبدالکریم حسیب، نن د پاسپورټ ریاست د نوي رییس په توګه معرفي شو.
د طالبانو د کونیو چارو وزارت چارواکو د نوي رييس د معرفۍ په مراسمو کې د مخکيني رييس پاسوال مولوی عبدالحکیم حمدي د کړنو ستاینه وکړه.
د پاسپورټ لپاره د طالبانو نوي رییس پاسوال مولوی عبدالکریم حسیب په دې مراسمو کې ویلي: «د ولسونو لپاره به لا ډېر خدمتونه کوو، په چارو کې به حوصله او رښتین والي ته ژمن پاتې کیږو او د فساد سره به په کلکه مبارزه کوو»
د طالبانو له بیا واکمنيدو سره په څه باندې يو کال کې دا درېيم ځل دی، چې طالبان د پاسپورټ ریاست لپاره خپل رييس معرفي کوي.
د دوی د لومړني رييس مولوي علم ګل حقاني يو ورور د طالبانو له لوري په زرګونو ډالرو د پاسپورټونو د کمیشن کارۍ او په پيسو یې د کابل په يوه هوټل کې د نجونو د نڅولو او شراب څښلو په تور نیول شوی و.
د علم ګل حقاني د ورور له نیول کیدو وروسته، چې ویډیو یې په ټولنیزو رسنیو کې خپره شوې وه، مولوي حقاني له دندې ګوښه شو، خو د ورور د قضیې په اړه ېې خلکو ته وضاحت ورنه کړل شو.
عام خلک په پاسپورټ ریاست کې د بیساري فساد ادعا کوي او وايي، چې د یوه پاسپورټ په جوړولو طالب چارواکي تر یو نیم زر امریکايي ډالرو رشوت اخلي، خو طالبان دا ادعاوې بې بنسټه بولي.