تاند(چهارشنبه، د میزان ۲۰مه) د طالبانو د حکومت د بهرنیو چارو وزیر امیرخان متقي د افغانستان لپاره د ملګروملتو د بشري حقونو له ځانګړي راپورتر ریچارد بینیت سره په افغانستان کې د بشري حقونو د وضعیت په اړه خبرې وکړې.
د باختر خبري اژانس د راپور له مخې، مولوي امیرخان متقي په افغانستان کې د بشري حقونو په وضعیت کې د پرمختګونو یادونه وکړه او ویې ویل، جنګسالاران، انسان تښتوونکي او غاصبان نور د چا حقونه نه شي خوړلای.
د بهرنيو چارو وزارت سرپرست وویل: « پر یو بل د نیوکو پر ځای باید همکاري سره وکړو، حقایق خپاره کړو او کوم پرمختګونه چي شوي هغو ته وده ورکړو.»
د ملګرو ملتونو ځانګړي راپورتر بینټ وویل، د حقایقو د سم بیان او راپور ورکولو لپاره لازمه ده چې هر څه په خپلو سترګو وویني او له همدې کبله يې افغانستان ته د سفر کولو پرېکړه کړې ده. نوموړي د اسلامي امارت د چارواکو لخوا د برابرو شویو اسانتیاوو مننه او د هر ډول متقابلې همکارۍ ژمنه وکړه.