تاند(دوشنبه، د میزان ۱۸ مه) له بهر مېشتو افغانانو سره د تماس لپاره د طالبانو د حکومت ځانګړی کمیسیون وايي چې د کندهار پخوانی والي توریالی ویسا هیواد ته راستون شو.
توریالی ویسا د حامد کرزي په حکومت کې د کندهار والي و.
له بهرمېشتو افغان شخصیتونو سره د اسلامي امارت کمیسیون وايي چې ښاغلی ویسا د دغه کمیسیون د تماسونو او هلوځلو په نتیجه کې هیواد ته راستون شوی دی.
د کمیسیون غړیو د کابل په هوايي ډګر کې د توریالي ویسا هرکلی وکړ.
تر دې وړاندې لسګونه پخواني چارواکي د کمیسیون د تماسونو په نتیجه کې بېرته هیواد ته راګرځېدلي دي.
توریالي ویسا د کرنې او مالدارۍ په برخه کې په کاناډا کې لوړې زده کړې کړي.
ده یوه موده د کاناډا په بریټش کولمبیا پوهنتون کې استادي هم کړې ده.
ویسا د ۱۳۸۷ لمریز کال د قوس میاشتې په وروستیو کې د کندهار والي وګومارل شو.
تر ده مخکې جنرال رحمت الله روفي د ۳ میاشتو لپاره د کندهار والي و خو د احمدولي کرزي د مخالفت له کبله له دندې لاس په سر شو.