تاند:(جمعه ،د ميزان ۱۴مه)‏‌ ‏د طالبانو د رژيم عمومي ویاند ذبیح‌الله مجاهد وايي ،چې د نجونو ښوونځیو د پرانیستلو لپاره په لوړه کچه کار روان دی.

د هغه په وينا هڅې رواني دي چې ژر تر ژره له شپږم ټولګي پورته د نجونو ښوونځي پرانیستل شي.

 د ذبيح الله مجاهد د معلوماتو له مخې، د دې ستونزې د حل لپاره په لوړه کچه کار پیل شوی دی.

هغه زياتوي: « موږ لنډ دومره ویلای شو چې باید امیداواره واوسو، ان‌شاء الله د دې لپاره کار روان دی. خدای مهربان دی چې هغه ټولې ستونزې رفع او دغه نیمګړتیا پوره شي.»

طالبانو پر افغانستان له بيا واکمنيدو وروسته، له څه باندې يوه کال راهيسې له شپږم ټولګي څخه د نجونو پورته ښوونځي تړلي دي.

طالب چارواکو د دغو ښوونځيو د بیرته پرانیستلو په اړه د لازمو طرحو او اقداماتو ژمنې کړي، خو نه عملي کېدو يې په هېواد دننه او نړيواله کچه خلک سخت قهرولي دي.

د طالبانو د وياند ذبيح الله مجاهد له وروستيو څرګندونو په ټولنیزو رسنیو کې هرکلی شوی.

خلکو ټينګار کړی، چې طالب چارواکي بايد په دې اړه پر خپلو ژمنو ودريږي او د ملت او نړيوالې ټولنې غوښتنو ته غاړه کېږدي.