تاند(چهارشنبه، د میزان ۱۳مه) د کورنیو چارووزارت وايي، دغه وزارت ته څېرمه په جومات کې د نننۍ چاودنې له کبله ۴ تنه وژل شوي او ۲۵ نور ژوبل دي.
راپورونه وايي چې چاودنه په جومات کې دننه شوې ده.
د کورنیو چارووزارت ویندوی عبدالنافع ټکور رسنیو ته په استولې خبرپاڼه کې ویلي چې جومات د کورنیو چارو وزارت له انګړه دباندې دی او دې جومات ته اکثره عام خلک د لمانځه لپاره ځي خو کله کله د کورنیو چارو وزارت ځینې مامورین هم په دغه جومات کې لمونځ ادا کوي.
د کابل د ایمرجنسي روغتون ډاکتران هم تاییدوي چې ۲۰ ټپیان وروړل شوي دي.
د دغه روغتون پر اساس، دا سږ کال تر دې دمه په کابل کې ۲۳ پېښه ده چې ټپیان یې وروړل کېږي.
دا چاودنه څو ورځې وروسته له دې وشوه چې د کابل په لوېدیځ کې په یوه ښوونیز مرکز کې چاودنې ۵۳ تنه ووژل او څه باندې ۱۰۰ تنه نور یې ژویل کړل.