تاند:(چار شنبه ،د ميزان ۱۳مه) په افغانستان کې د طالبانو د حاکمې ادارې چارواکي وايي چې په هېواد کې یو میلیون ښځې اوماشومان په مخدرو موادو روږدي دي.
د طالبانو د رياست الوزرا اداري مرستيال مولوي عبدالسلام حنفي د ښوونکي نړیوالې ورځې په نمانځغونډه کې وویل چې اوسمهال په هېواد کې کابو ۵ميليونه کسان په نشه يي توکو روږدي دي، چې يو ميليون يې ښځې او ماشومان دي او د روږدو کسانو ډېری برخه لوستي کسان دي.
په دې غونډه کې د طالبانو د پوهنې وزارت سرپرست مولوي حبیب آغا وویل، چې اوسمهال په ټول هېواد کې ۲۴۷ زره ښوونکي په دندو بوخت دي.
د ماشومانو د ژغورنې نړیوال سازمان پرون اعلان وکړ،چې د افغانستان ښوونيز نظام په نړيواله کچه تر ټولو ډېر سقوط ته نیږدې ښوونيز نظام دی.
د ياد شوي سازمان د تېر ميلادي کال په ارزونه کې د افغان ښوونيز نظام دغه خطرناک مقام څلورم و، خو سږکال لومړي مقام ته رسېدلی.
په افغانستان کې د طالبانو له بيا واکمنيدو وروسته، څه باندې یو کال کیږي چې نجونو ته له شپږم څخه په پورته ټولګيو کې د زده کړو اجازه نه ورکول کېږي.
د طالبانو دغه چلند د ځینو منځلارو طالب مشرانو ترڅنګ د دیني عالمانو، ملي او نړيوالو ادرسونو له سختو اعتراضونو سره مخ شوی.
تېره اونۍ د افغانستان په مختلفو ښارونو کې د نجونو د زده کړو پر وړاندې د شته خنډونو د ختمولو لپاره زرګونه نجونو مظاهرې وکړې.
د طالبانو چارواکو د خپلې يادې پرېکړې په اړه بېلابېلې څرګندونې کړي، چې خلکو د قناعت وړ نه دي ګڼلي او د نجونو د تړل شويو ښوونځيو د ژر پرانیستل کیدو غوښتنه یې کړې ده.