تاند:(چار شنبه ،د ميزان ۱۳مه) په پنجشېر کې د طالبانو له لوري د بشري حقونو د نقض د تورونو له رامنځته کيدو وروسته د افغانستان لپاره د ملګرو ملتونو د سیاسي استازولۍ دفتر «یوناما» دغه ولايت ته یو پلاوی لیږلی.
یوناما په یوې اعلامیې کې ویلي دي چې ټیمونو یې د پنجشیر لپاره د طالبانو والي سره هم لیدلي دي، خو په دې اړه یې نور معلومات نه دي ورکړي.
يوناما په دغه لنډه اعلامیه کې زیاتوي:«حساب ورکوونه او د ټولو افغانانو د حقونو ساتنه د سولې اساسي کیلي ده. یوناما به په دې اړه خپل نظارت روان ساتي.»
څه موده مخکې د طالبانو یوې مخالفې جنګي ډلی (پنجشېر مقاومت ډلې) او يو شمېر ځايي خلکو د يوې ویډیو له خپرولو سره ادعا وکړه د، چې طالبانو یې ۸ اسیر شوي جنګيالي وژلي.
د طالبانو د دفاع وزارت ویلي وو چې په دې اړه به «جدي تحقیقات» وکړي او که معلومه شي چې دا ویدیو تازه ده او دا پېښه د پنجشیر په ولایت کې شوې، «هغوی، چې اسیران یې وژلي» حتمآ به نیول کېږي او د «قانون منګولو ته به سپارل» کېږي.
د پنجشېر او ټول هېواد په اړه طالبان ادعا کوي،چې هیڅ مخالفه جنګي ډله ېې فزیکي موجودیت نه لري، خو پنجشېر مقاومت ډله او نورې طالب ضدې جنګي ډلې بيا د طالبانو خلاف وخت په وخت د مرګ ژوبلې او نورو زيان اړولو ادعاوې کوي.
په افغانستان کې د بیان ازادۍ او رسنيو له محدودیت سره د ډېرو پېښو په اړه بې طرفه رسنۍ د دقیقو خبرونو په خپرولو کې ستونزو سره مخامخ دي.
ځینې خبریالان شکایت کوي،چې طالبان او مخالفې جنګي ډلی یې دواړو په دروغجنو تبليغاتو او غلطو معلوماتو د دوی د بې طرفه اطلاع رسولو کار ستونزمن کړی دی.