تاند:(پنجشنبه ،د ميزان ۷مه) د طالبانو د حاکمې ادارې ویاند ذبیح الله مجاهد وايي چې د هېواد په کچه د خوراکي او سون توکو بیې د پام وړ راټيټې شوې دي.
د هغه په وينا، د دوی سوداګرۍ او نورو وزارتونو او بنسټونو په هڅو به لا هم د اړینو توکو بیې کنټرول او په بازارونو کې به د سالم رقابت له لارې د هر توکي بیه ټيټه وساتل شي.
يو شمير خلکو په دې برخه کې له سیمه ییزو هېوادونو سره د طالبانو تړونونه ستايلي، خو ویلي چې د بې کارۍ او اقتصادي ناورين له امله په ټيټه بيه هم د توکیو د پېرلو وس نه لري.
اقتصادي شنونکو بيا دا تړونونه سياسي او لنډمهاله ګڼلي او له طالبانو یې غوښتي،چې له مسلکي کادرونو څخه په استفادې او نړيوالو سره د مثبت تعامل په اساس د پراخيدونکي بشري او اقتصادي ناورين د حل لپاره اساسي ګامونه واخلي.