تاند(سې شنبه، د ثور۳۰ ) د کندوز والي عبدالجبار نعمیي، چې له یوې مودې راهیسې ناروغ و، له دندې استعفا ورکړه.
د ښاغلي نعیمي ویندوی عصمت الله مرادي نن اعلان وکړ چې نعیمي د خپلې ناروغۍ د درملنې لپاره له دندې استعفا کړې ده.
ښاغلی نعمیي ۲۷ میاشتې د کندوز د والي په توګه کار وکړ.
نوموړی څه موده وړاندې د ناروغۍ له کبله په روغتون کې بستر شو او جراحي عملیات یې وکړل.
مرادي وايي، نعیمي د ډاکترانو په مشوره درملنې ته دوام ورکړی او له دې کبله یې دنده پرې ایښې ده.
عبدالجبار نعیمي د جهاد په کلونو کې د مجاهدینو د نرم دریځي تنظیم ملي اسلامي محاذ غړی و.
ده په خوست او لغمان کې هم د والي په توګه دنده ترسره کړې ده.
د ښاغلي نعیمي د استعفا خبر په داسې ورځ خپور شو چې وسله والو طالبانو د دغه ولایت د مرکز او څو ولسوالیو د نیولو لپاره تېره شپه پراخ بریدونه وکړل خو د کندوز د چارواکو په وینا د طالبانو بریدونه یې ځپلي او مرګ ژوبله یې وراړولې ده.
د افغانستان د دفاع سرپرست وزیر اسدالله خالد د کندوز د امنیتي وضعیت د کتلو لپاره دغه ښار ته لاړ.
همداراز نن په کندوز ښار کې یوې چاودنې ۴ تنه ژوبل کړل.
د افغانستان امنیتي ادارې وايي، طالبان هڅه کوي چې د سولې د خبرو تر پیلېدو وړاندې د افغانستان دوه یا درې ښارونه ونیسي.
طالبانو پخوا کندوز ښار ۲ ځلې د لنډ وخت لپاره نیولی چې په نتیجه کې یې سلګونه تنه وژل شوي، او د ملیاردونو افغانیو زیان پېښ شوی دی.