تاند:( دوشنبه ،د ميزان ۴مه) په هندوستان کې د افغانستان د پرزول شوي نظام سفير ډاکټر فرید ماموندزی،چې لا هم د سفیر په توګه پر دندې دی، د افغانستان په اړه د پاکستاني صدراعظم شهباز شريف وروستيو تورونو ته غبرګون ښودلی.
د پاکستان صدراعظم شهباز شريف څو ورځې مخکې د ملګرو ملتونو سازمان په عمومي اسامبلې کې تور پورې کړ،چې طالبانو په افغانستان کې ګڼو ترهګرو ډلو ته پناه ورکړې ده.
په هندوستان کې د افغانستان سفير نوموړي ته په خطاب کې ویلي،چې د نړۍ د ټولو تروريستي پېښو تر شل سلنې پورې قربانيان افغانان دي.
هغه له تروریزم څخه د دولتي ملاتړ له اصطلاح سره د ترهګرو ډلو د تولید، تمويل او استعمال په اړه د پاکستان نقش ته اشاره کړې ده.
پاکستان بیا-بيا تورن شوی،چې پوځ او استخباراتو ېې ګڼې ترهګرې ډلې جوړې کړي او د خپلو ستراتیژیکو هدفونو لپاره کارولي.
په دې اړه تورونه تر نړیوالې کچې مطرح شوي او پاکستان د دولت په کچه د ترهګرو ملاتړی هېواد ګڼل کېږي.