تاند:( چار شنبه،د سنبلې درويشتمه) د افغانستان برېښنا شرکت وايي، چې د سپټمبر تر پایه به د ازبکستان هېواد ټول پورونه ادا شي او له یاد هېواد سره به د برېښنا واردولو نوی تړون لاسلیک کړي.
د برېښنا شرکت لپاره د طالبانو له لوري ټاکل شوي عمومي اجرائیوي رئيس ملا محمد حنیف حمزه ویلي،چې په دې اړه ېې د ازبکستان د برېښنا ملي شبکې له رئیس او نورو مسوولینو سره پر ویډیویي کنفرانس خبرې کړي دي.
د هغه په وينا، په دغه کنفرانس کې د ۲۰۲۲ کال لپاره د برېښنا پېرلو تړون پر پلی کولو ټینګار، د سرخان ـ پلخمري ۵۰۰ کیلو ولټ پروژې او پورونو د تادیې په اړه خبرې شوې دي.
د برېښنا شرکت عملیاتي رئیس صفي الله احمدزي ویلي، چې د سرخان ـ پلخمري ۵۰۰ کیلو ولټ مزي پروژه د اسیا پراختیایي بانک له لورې تمویلېدله، خو اوس یې کارونه ولاړ دي، خو ویل شوي چې آسیا پراختیايي بانک د خپلو تمویلوونکو پروژو ارزونې پیل کړې، په خبره یې، هېله شته چې دوی بېرته د یادې پروژو پلي کولو ته چمتو شي.
طالبانو نه دي ويلي،چې د ازبکستان هېواد څخه څومره پوروړي دي او دغه پورونه له کومو پیسو ادا کوي.