تاند(سې شنبه، د ثور۳۰ ) په هرات کې یو شمېر ډاکترانو او طبي کارکوونکو نن په دې خاطر اعتراض وکړ چې معاش نه دی ورکړل شوی.
په هرات کې شاوخوا ۲۰۰ ډاکترانو او طبي کارکوونکو د اعتراض په مهال وویل، سره له دې چې خپل ژوند یې د کورونا وایرس له کبله له خطر سره مخامخ کړی له درو میاشتو راهیسې معاش نه دی ورکړل شوی.
هرات، چې د افغانستان درېم لوی ښار دی، د کورونا لومړنۍ پېښې پکې ثبت شوي او هره ورځ له ایران څخه سلګونه افغان کډوال ورته راستنېږي.
د کورونا وایرس لومړنۍ پېښه د مارچ په لسمه په هرات کې ثبت شوه.
اعتراض کوونکو ویل«موږ د خلکو د ژغورلو لپاره خپل ژوند په خطر کې اچولی، ګڼ ډاکتران مو په کورونا وایرس اخته شوي، نو حکومت هم باید لږترلږه موږ ته درناوی وکړي او معاش راکړي.»
د هرات ۷۸ ډاکترانو او ۱۱۰ طبي کارکوونکو ۶ ساعته اعتراض ته دوام ورکړ او وروسته بېرته روغتون ته لاړل.
د عامې روغتیا وزارت تایید کړه چې ډاکترانو ته په وخت معاش نه دی رسېدلی خو دا وزارت هڅه کوي چې په څو ورځو کې هغوی ته معاش ورسوي.
د یکشنبې په ورځ د کندوز د کووید نولس د درملنې او تجرید د مرکز ډاکترانو او روغتیاپالانو په دې خاطر اعتراض وکړ چې د عامې روغتیا وزارت د دوی قرارداد تمدید نه کړ.