تاند:( پنجشنبه،د سنبلې اوولسمه) د طالبانو د ټرانسپورټ او هوايي چلند وزارت او د عربي متحدو اماراتو د ګاک (GAAC) نړیوال شرکت مسئولینو نن، د طالبانو د رياست الوزرا د اقتصادي مرستیال ملا عبدالغني برادر اخوند په موجوديت کې، “الوتکو ته د هوايي لارښوونې خدمتونو او انکشاف” قرارداد لاسليک کړ.
ملا برادر اخند په دې غونډه کې وويل: څو موده مخکې مو د متحده عربي اماراتو همدغه شرکت سره د درېیو مهمو هوايي ډګرونو (کابل، قندهار او هرات) د ځمکني خدمتونو د وړاندې کولو تړون لاسلیک کړ، چې په پایله کې یې افغانستان ته ځینې نړیوالې الوتنې بیا پیل شوې او تر یوې اندازې یې د هېواد پر تجارت او اقتصادي ودې مثبت تاثیر درلود.
د طالبانو د ټرانسپورټ او هوايي چلند سرپرست وزیر وویل: الوتكو ته د هوايي لارښوونې خدمتونو انکشاف او په هوايي ډګرونو کې د ځینو خدمتونو چمتو کول؛ هغو الوتکو ته چې د افغانستان له فضا څخه تېرېږي او یا په نړیوالو هوايي ډګرونو کې ناسته کوي، په نړیواله کچه د خدمتونو وړاندې کول؛ د الوتکو خوندیتوب، د عبوري الوتنو د عوایدو سرچینې بیا پرانیستل کېدل او د هېواد په هوايي ډګرونو کې د معیاري خدمتونو وړاندې کول، د دې پروژې مهمې موخې وبللې.
طالب چارواکو له ډېرو جزییاتو پرته ویلي، په دغه قرارداد کې د دواړو لوریو ګټه په پام کې نیول شوې او تر راتلونکو ۱۰ کلونو پورې به دوام وکړي.