تاند:(دوشنبه،د سنبلې څوارلسمه) راپورونه وايي، چې هېواد ته د افغان شخصیتونو د ستنولو لپاره د طالبانو د کميسيون په هڅو کابل ته يو شمېر ستانه شوي پخواني چارواکي او سياستوال بیرته له هېواده د باندې وتلي.
د افغانستان د برېښنا شرکت پخوانی رييس امان الله غالب، د حج او اوقافو پخوانی وزير محمد صديق چکري، د دفاع وزارت پخوانی وياند جنرال دولت وزيري او يو شمېر نور هغه کسان ښودل شوي، چې هېواد ته له ستنېدو وروسته بيرته له هیواده وتلي.
د طالبانو يوه مطبوعاتي مبلغ مبين، چې ځان جنرال مبين بولي، په دې اړه له نیوکو سره غوښتنه کړې چې هېواد ته ستنیدونکي شخصيتونه بايد ممنوع الخروج شي.
د هغه په وينا دغه کسان اکثره هېواد ته د خپلو جایدادونو د پلورلو لپاره ستنيږي او بيرته له هیواده وځي.
د دفاع وزارت پخواني وياند جنرال دولت وزیري بیا ويلي،چې هغه د ځينو روغتيايي ستونزو له امله هېواد نه وتی او بيرته به ستون شي.
د طالبانو د شخصيتونو د ستنولو کميسيون چارواکي وايي،چې د فعاليت له پيل سره يې شاوخوا يو نيم سل تنه بهر ته تللي شخصيتونه هېواد ته ستانه شوي.