تاند( چار شنبه ، د سنبلې دويمه) په کابل کې د چین سفیر وانگ یو د طالبانو د معادن او پټرولیم وزارت سرپرست شیخ شهاب الدین دلاور سره لیدلي.
د طالبانو په یوه اعلامیه کې راغلي،چې دواړو لوريو د مس عینک او آمو سیند د پروژې د ستونزو په اړه بحث او د نظرونو تبادله کړې ده.
په اعلامیه کې د چین د سفير له قوله ويل شوي،چې د مس عینک پروژې چارې او استخراج به ډېر ژر پیل شي.
طالبانو په دې اړه نور جزییات نه دي ورکړي.
د مس عینک پروژې د استخراج پروژه له ډېرو کلونو راهيسې په جمهوري نظام کې چين ته ورکړل شوې وه،خو په مختلفو دلایلو دا پروژه نه عملي کیده.