تاند( دوشنبه ، د اسد ۳۱ مه) د افغانستان د هوا پېژندنې ادارې اعلان وکړ، چې نن او سبا به په ۲۱ ولایتونو کې شدید ورښتونه وشي او سېلاوونه به ورسره راشي.
د دې ادارې له اټکل سره سم، په ګڼو ځایونو کې د نورو سیلونو د راوتلو احتمال شته.
دغې ادارې له هغو خلکو چې د احتمالي سېلاوونو د راوتو سيمو ته په نیږدې سيمو کې ژوند کوي غوښتي،چې احتیاطي تدابیر ونیسي.
له پېښو سره د مبارزې د وزارت د معلوماتو له مخې، د وروستۍ یوې میاشتې په سیلونو کې لږترلږه ۱۷۰ تنه مړه شوي او ۲۵۰ نور ژوبل شوي دي.
تر ټولو وروستۍ مرګونې پېښې د شنبې په ورځ د لوګر ولایت په خوښۍ ولسوالي کې وه چې لږترلږه ۲۰ تنه پکې مړه او ۳۰ نور ټپیان شول.
په افغانستان کې پر حکومتي تدابيرو سربېره د کور جوړولو پر وخت د مسلکي انجينرانو له لوري د نقشو نه ډیزاین،خپلسري او ناقانونه کور جوړول او په دې برخه کې د حکومتونو نه پاملرنه د طبيعي پېښو له کبله د ډیرو ځاني او مالي زیانونو اصلي لاملونه ګڼل کېږي.