تاند( سې شنبه ، د اسد ۲۵ مه) د ملګرو ملتونو د بشري مرستو د همغږۍ ادارې(اوچا) په افغانستان کې د پوليو ناروغۍ پر وړاندې د مبارزې د برياليتوب خبر ورکړی او ویلي،چې تېر کال د دغې ناروغۍ يا د ماشومانو د فلج کیدو يوازې يوه نوې پېښه ثبت شوې ده.
اوچا د پوليو پر وړاندې مبارزه کې دا د افغانستان لپاره لویه او تاریخي لاسته راوړنه ګڼلې ده.
سرچینې زیاته کړې،چې په ۲۰۲۱ کې د دغو ثبت شویو پېښو کچه ۴ او په ۲۰۲۰ کې ۵۶ وه.
دغه نړیوال سازمان په دې مبارزه کې د افغانستان د پوليو ضدو فعالانو قربانۍ هم يادې کړي او ويلي،چې د روان کال په فبرورۍ کې د طالب واکمنۍ پر مهال د افغانستان ۸ واکسيناتوران،چې ۴ ېې مېرمنې وې، ووژل شوې.
اوچا ادارې په ورته وخت کې، په افغانستان کې د کولرا،سرخکان،ډنګيتبې او کنګو مرضونو د زياتيدو خبرداری ورکړی.
د طالبانو چارواکو په دې اړه څه نه دي ويلي.
مخکې کلونو کې طالبان تر خپلو واک لاندې سیمو د پوليو واکسين د تطبيق په مخالفت او د کارکوونکو په وژلو او ګواښلو تورنیدل،خو اوس طالب چارواکي خلک خپلو ماشومانو ته د دغه واکسين د تطبيق لپاره هڅوي.