تاند( سې شنبه ، د اسد ۲۵ مه) د طالبانو د واکمنۍ عمومي ویاند ذبیح الله مجاهد وايي،چې دویپه پنجشیرکې هیڅ کومه نظامي پیښه نه لري.
د هغه په وينا،هلته طالبانو ته د تلفاتو یا ژوندي نیولو ادعا حقیقت نه لري.
طالب ویاند زیاتوي:«دښمن په هغه موقف کې نه دی چې داسې څه وشي کولای.»
په پنجشېر کې د طالبانو خلاف د مقاومت جبهې د دغه ولايت په عنابه دره کې د طالبانو خلاف د پراخو عملياتو ادعا کړې ده.
يادې جبهې په يوه اعلاميه کې ويلي،چې دغه عمليات يې د پنجشېر په عنابه دره کې کړي.
سرچينه زياتوي،په دې عملياتو کې ۵طالب جنګيالي وژل شوي،۳ټپيان او ۴۰ نور اسیران شوي دي.
يادې جبهې په خپله ويب پاڼه کې د اسیر شويو طالب جنګياليو عکسونه او ویډیو هم خپاره کړي،چې د مقاومت ډلې له جنګياليو سره يو ځای ښودل کېږي.
د طالبانو د دفاع وزیر ملا یعقوب مجاهد پرون د دې ډلې د بیا واکمنيدو په لومړي کليزه کې وويل:«هر هغه څوک چې د شر اوفساد ډلې تمویلوي، هغوی باید واوري چې دوی په دغه شومه اراده کې تر منزل نه شي رسېدای.»
په وروستيو کې د طالبانو د مخالفو سياسي او نظامي ډلو فعاليتونه او انسجام په ډېرېدو دی.