تاند( سې شنبه ، د اسد ۱۱ مه) د افغانستان د کورنیو چارو پخواني وزير او د ملي امنیت پخواني سرپرست مسعود اندرابي له نړیوالې ټولنې غوښتي، چې په کابل کې د طالبانو د واکمنې ادارې پر ضد نړيواله اجماع رامنځته کړي.
نوموړي په یوه ټویټ کې لیکلي، چې په کابل کې د القاعدې شبکې د مشر ایمن الظواهري له وژل کيدو سره د طالبانو او القاعدې شبکې ژورې اړیکې لا نور په ډاګه شوې.
هغه ټينګار کړی، چې د طالبانو د واکمنۍ پر ضد د نړيوالې اجماع رامنځته کیدل يوه جدي اړتيا ده، څو په افغانستان کې د ترهګرۍ او افراطیت زياتيدونکی خطر مهار او افغانان یې له اسارت څخه وژغورل شي.
د افغانستان جمهوري غوښتونکي سياسي خوځښت بيا د کابل په وزير اکبرخان سیمه کې د امریکا د بې پیلوټه الوتکې د برید پر مهال د القاعدې شبکې د مشر ایمن الظواهري وژل کیدو ته په غبرګون کې ویلي، چې دا برید د پاکستان له استخباراتي او عملي همکارۍ پرته ممکن نه و.
د امريکا متحده ايالاتو د بهرنيو چارو وزير انتوني بلینکن په یوه اعلامیه کې، چې په کابل کې د القاعدې شبکې د مشر ایمن الظواهري د وژل کیدو په اړه خپره شوې، طالبان له افغانانو او نړيوالو سره په خیانت تورن کړي دي.
نوموړي له امریکا سره د طالبانو د دوحې د سولې تړون ته اشاره کړې، چې طالبانو پکې له القاعدې او نورو ترهګرو ډلو سره د اړيکو د پرې کولو او دغه راز د افغانستان له خاورې د دوی د نه استفادې ژمنه کړې وه.
امریکايي وزیر په عین حال کې نه دي ويلي، چې د طالبانو د دغه«خيانت» پر وړاندې به ېې د هېواد دريځ څه وي.
طالبانو تر اوسه په مشخص ډول د ایمن الظواهري د وژل کیدو د اعلان په اړه، چې تېره شپه د امریکا د ولسمشر جوبایډن له لوري وشو، کوم غبرګون نه دی ښودلی.
الظواهري، چې اصلآ مصری و، تېره شپه یې د امريکا متحده ايالاتو ولسمشر جوبایډن د کابل په وزير اکبرخان سیمه کې د امریکا د بې پیلوټه الوتکې د برید پر مهال د وژل کیدو اعلان وکړ.
ويل شوي، چې نوموړی اوړمه ورځ وژل شوی.