تاند( پنجشنبه ، د اسد ۶ مه) د پکتیا په روحاني بابا ولسوالۍ کې یوه شپږ کلنه نجلۍ له تښتول کیدو وروسته سنګسار شوې ده.
د دغې نجلۍ پلار محمد جنت وايي، چې لور یې د لوی اختر پر دویمه ورځ تښتول شوې وه او پرون یې مړی په یوه کنډواله کې موندلی دی.
تر اوسه د دې ماشومې د قتل انګېزه روښانه نه ده. د ماشومې پلار ویلي، چې له هېچا سره دښمني نه لري.
پکتیا کې د طالبانو ځایي مسوولانو د دې نجلۍ وژل کېدل تایید کړي او ویلي یې دي، چې د دغه قتل په تړاو یې درې تنه نیولي دي.
په وروستیو کې له پکتیا څخه د جنایي جرمونو، مرموزو وژنو او وسله والو فعالیتونو د زیاتېدو خبرونه ورکړل شوي.
دا په داسې حال کې ده، چې د طالبانو چارواکي د بشپړ امنيت خبرې کوي.