تاند( پنجشنبه ، د اسد ۶ مه) د میدان وردګو د عامې روغتیا مسوولین خبر ورکوي، چې د دغه ولایت په روغتیایي مرکزونو کې په کولرا ته ورته ۵۰ شکمن ناروغان بستر شوي.
د دوی په وينا، کومه ناروغي چې اوس مهال د خپرېدو په حال کې ده «کولرا» ته ورته نښې لري.
مسوولین وایي، دغه ناروغي نس ناستي ته ورته ده، خو له دغې وبا تراوسه په میدان وردګ کې څوک تر اوسه له دې کبله نه دی مړ شوی او د کنترول په حال کې ده.
کولرا ته ورته يوې ناروغۍ د افغانستان د سويل په مختلفو ولايتونو او يو شمېر نورو سيمو کې لسګونه تنه مړه کړي او سلګونه نور پرې اخته شوي.
خلک د دې ناروغۍ په درملنه او پر وخت تشخيص کې روغتيايي ادارې پاتې بولي او نړيوالو سازمانونو نه د مرستې او عاجل لاسنیوي غوښتنه کوي.