تاند(چهارشنبه، د اسد۵ مه) د افغانستان د هوا پېژندنې ادارې اټکل کړی چې نن او سبا په ۱۹ ولایتونو کې د شدیدو بارانونو او ورسره جوخت د سیلونو د جاري کېدو احتمال شته.
کابل، کونړ، نورستان، ننګرهار، لغمان، خوست، پکتیا، پکتیکا، لوګر، اروزګان، زابل، کندهار، هلمند، غور، میدان وردک، غزني، دایکنډي، زابل او هلمند هغه ولایتونه دي چې د سیل او ورښت وړاندوینه پکې شوې ده.
د هوا پېژندنې د ادارې له اټکل سره سم، د ورښت اندازه به د ۱۰ او ۵۰ میلي مترو ترمنځ وي.
په وروستۍ یوه میاشت کې د افغانستان په یو شمېر ولایتونو کې د پر له پسې بارانونو او سیلونو له کبله لسګونه کسان مړه شوي او ډېر مالي زیانونه پېښ شوي دي.
سږني ورښتونه بې ساري ګڼل شوي ځکه چې د کال په دې موسم کې عموماً په افغانستان کې باران نه اوري خو د هوا پېژندنې او چاپېریال ساتنې متخصصان وايي چې وچکالۍ او بې وخته ورښتونه د اقلیمي بدلون نتیحه ده.