تاند( سې شنبه ، د سرطان ۲۸ ) د پکتیکا د ګیان ولسوالۍ په ږلۍ کلي کې له تېر مازیګر راهیسې زلزله پیل شوې چې د تېرې شپې تر ناوخته یې دوام درلود.
د طالبانو ځايي چارواکي وایي چې په یاد کلي کې له ځمکې ویرونکی غږ راپورته کېږي چې د سیمې خلک یې په رواني تکلیف اخته کړي.
هغوی له اړوندو ادارو غوښتي چې سیمې ته جیولوجیکي ټیم ولېږي چې څېړنه وکړي.
پرون ناوخته ځايي چارواکو د وروستیو زلزلو له کبله د لسو تنو د ټپي کیدو او لسګونه کورونو د ویجاړیدو خبر ورکړی و.
پکتیکا کې څه موده مخکې د یوې سختې زلزلې له امله تر زرو پورې کسان وژل شوي او څو زره تنه نور ټپيان شول.
د يادې زلزلې وران شوي ځايونه تر اوسه پورې بيرته رغول شوي نه دي او سلګونه زره کسان دغې زلزلې زيانمن کړي دي.